fbpx
Home > ठळक बातम्या > ‘महा’ चक्रीवादळामुळे पालघरमधील शाळा तीन दिवस बंद!

‘महा’ चक्रीवादळामुळे पालघरमधील शाळा तीन दिवस बंद!

अरबी समुद्रात ‘महा’नावाचे चक्रीवादळ निर्माण झाले असून हे चक्रीवादळ ६ नोव्हेंबर ते ८ नोव्हेंबर या कालावधीत धडकणार आहे. या वादळाचा फटका पालघर जिल्ह्याला बसण्याची शक्यता असल्याने जिल्ह्यातील शाळा, कॉलेज बंद ठेवण्याचा निर्णय जिल्हा प्रशासनाने घेतला आहे. मच्छिमारांनी समुद्रात जाऊ नये, गरज असेल तरच घराबाहेर पडावं असे आवाहन पालघरचे जिल्हाधिकारी डॉ. कैलास शिंदे यांनी केले आहे.

जिल्हा प्रशासनाने खबरदारीच्या सूचना जारी केल्या आहेत. आपतकालीन परिस्थितीचा सामना करणाऱ्या सर्व संबधित यंत्रणांच्या अधिकाऱ्यांशी जिल्हाधिकाऱ्यांनी संवाद साधला. यावेळी निवासी उपजिल्हाधिकारी संजय जाधव पाटील उपस्थित होते.

जिल्ह्यातील मच्छिमारांनी पुढील तीन दिवस, ८ नोव्हेंबरपर्यंत मासेमारीसाठी समुद्रात जाऊ नये, तसेच जे मच्छिमार समुद्रात गेले आहेत त्यांनी तातडीने परत यावे आणि परतताना जवळच्या बंदरांवर आसरा घ्यावा, असे आवाहन जिल्हाधिकारी डॉ. कैलाश शिंदे यांनी केले आहे.

सुट्टीचा कालावधी असल्याने समुद्रकिनाऱ्यावर पर्यटकांची मोठ्या प्रमाणात गर्दी होते. या वादळाचा संभाव्य धोका लक्षात घेवून पर्यटकांनी समुद्र किनारी जाणे टाळावे असे आवाहन जिल्हा प्रशासनाच्यावतीने करण्यात आले आहे. नैसर्गिक आपत्तीत मदतीसाठी राष्ट्रीय आपत्ती निवारण दलाच्या तुकड्या मुंबई, पुणे येथे तैनात असून आवश्यकता भासल्यास त्यांची मदत घेतली जाईल अशीही माहिती जिल्हाधिकारी डॉ. शिंदे यांनी दिली.

पालिका, महसूल, आरोग्य, वैद्यकीय पथक, आपत्ती व्यवस्थापन आणि इतर सर्व यंत्रणाच्या अधिकारी- कर्मचारी वर्गाने मुख्यालयात राहण्याच्या सूचना देण्यात आल्या आहेत. तसेच रजेवर असणाऱ्या अधिकारी-कर्मचारी यांच्या रजा रद्द करण्यात आल्या असून तातडीने कामावर हजर होण्याचे सूचना जिल्हाधिकाऱ्यांनी दिल्या आहेत. चक्रीवादळामुळे पावसाचा अंदाज व्यक्त करण्यात आला आहे. खबरदारीचा उपाय म्हणून समुद्र किनाऱ्यालगतच्या गावांना अधिक सतर्क राहण्याच्या सूचना देण्यात आल्या आहेत.

पत्र्याची कच्ची घर, झोपड्यामध्ये राहणाऱ्या नागरिकांचे पक्क्या घरामध्ये स्थलांतर करणे, शेतकऱ्यांनी काढून ठेवलेली पिकं आणि बाजार समितीत आलेल्या अन्नधान्याची नासाडी होऊ नये यासाठी उपयोजना करण्याच्या करण्याच्या सूचना या बैठकीत संबंधित यंत्रणांना देण्यात आल्या आहेत.

Leave a Reply

Your email address will not be published. Required fields are marked *